බිහිසුණු හෙටක් කරා

එස් බී මහත්තයා මේ දිනවල ඉතා කාර්යබහුල වී ඇත. නිතර නිතර අපේ මාධ්‍ය මහත්තරු ද ඔහු සොයා යති. දින දෙකකට වරක්වත් ඔහුගේ ශ්‍රී මුඛයෙන් පිටවන රටක් වටිනා වදන් අපේ මාධ්‍ය තලු මරා රස විදියි.

ඉතා ගැඹුරින් පවතින තත්වය විමසා බැලුවහොත් පසක් වන සත්‍ය වනුයේ යන එන මං නැතිව දේශපාලනයේ නන්නත්තාරව සිටි එස් බී ආණ්ඩුවට රිංගන්නේ රාජපක්ෂලා වෙනුවෙන් ඕනෑම දහදුරා වැඩක් කිරීමට සැදී පැහැදී ගෙනය. චන්ද්‍රිකා වෙනුවෙන් ද එස් බී කළේ එයම ය.
මහින්ද ඉතිහාසය අමතක කර සියවස් ගණනකට රාජකීය සිහිනයක් දකියි. ඒ සිහිනය වෙනුවෙන් ඔහු ඉදිරියේ ඡන්දය දුන් හෘද සාක්ෂියක් සහිත මිනිසා සෑම ගත වන තත්පරයකදීම නොමරා මරයි.
අද එස් බී ට භාර දී ඇති ජොබ් එක එම සිහිනයට අවශ්‍ය පසුබිම නිර්මානය කිරීමයි. ඒ සදහා අද ඔහු දුප්පත් දෙමාපියන් දහඩිය කදුලින් උපයන සොච්චමෙන් අමාරුවෙන් සරසවියට එවනා දුව පුතාගේ ගැලවුම්කාරයා ගේ චරිතය රග දක්වයි.
ඔහු මේ දිනවල විශ්ව විද්‍යාල අතු ගා දැමීමේ සංග්‍රාමයට උර දී ඇත. ‍ජේ වි පි හිර කදවුරෙන් සරසවි මුදා ගන්නා දිනය වැඩි ඈතක නොවන බව රජයේ මාධ්‍ය ගණිකා සේවාවන් කෑගසන්නේ ඉතා උද්යෝගයෙනි. ගමේ සිටින අන්ධ ශ්‍රී ලංකාකාරයා මෙයට අත්පුඩි ගසන්නේ උඩ පැන පැනය.ඒ අනුව ඉතා පැහැදිලිව අන්තරය සුද්ද කිරීමේ කොන්තරත්තුව සදහා එස් බී නිර්වස්ත්‍රව කැප වී ඇත. සස්පෙන්ඩ් කිරීම එය සදහා ඇති ප්‍රධානතම අවිය යි. ළමයින් සස්පෙන්ඩ් වෙයි. එස් බී ඔවුන්ගේ කොන්ද කඩා එම තහනම ඉවත් කරයි. මෙවැනි ජවනිකා එන්න එන්නම කරළියේ එළිපිට රග දැක්වේ.අද වන විට අන්තරය දුර්වල කිරීමේ මෙහෙයුමට සමගාමීව නාමල්ගේ ඊනියා ශිෂ්‍ය කල්ලි පැටව් ගැසීමට පටන් ගෙන ඇත. කිසිදු ප්‍රතිපත්තිමය දැක්මක් නොමැති වරදාන වෙනුවෙන් කැප වුණු මේවා වෙනුවෙන් සිසුන් රංචු ගැසීම එක් අතකින් රටේ සමාජ ආර්ථික තත්වය පිළිබද සෝචනීය කතාවක් අමු අමුවේ කියා සිටී.
මේ අතර පුංචි නාමල් පුතා තම ජනාධිපති සිහිනය එළිපිට කතා තරන්නට පටන් ගෙන ඇත. ජෙනරාල් සිරගත කරන්නේ ඒ අතරය.　　
ජෙනරාල් සිරගත කිරීම තුළ මෙරට සමාජය පීඩක පාලකයෙකු යටතේ හැසිරෙන ආකාරය පිළබද පරීක්ෂාවක් මහින්ද සිදු කළ අතර ඒ තුළින් බලා‍පොරොත්තු වූයේ යම් හෙයකින් එයට ජනතාව කම්පනය කළ නොහැකි නම් තම ගමන සිත් ලෙස යාමයි.
18 තුළින් ද ඔහු එයම කළ අතර එයට සමාජය දැක්වූ අසංවේදීබව මහින්ද දිරිමත් කළේය.
ඒ අනුව ඉතාම පැහැදිලි වන කාරනය වන්නේ මහින්ද රජ පරපුරක පාලනයක් සදහා මෙරට හුරු කරමින් සිටින බවයි.
එ සදහා නැගෙන විරෝධය යටපත් කිරීමට නම් බුද්ධිමත් තාරුණ්‍යයේ එකතුවක් වන විශ්ව විද්‍යාල මර්දනය කළ යුතුය. අද වන විට පවතින ශක්තිමත්ම ශිෂ්‍ය එකමුතුව අන්තරය වන නිසා එය විනාශ කිරීම ප්‍රධාන ඉලක්කය වී ඇත.
අන්තරය වෙනුවෙන් අප පෙනී සිටිය යුතු නැත. නමුත් අන්තර‍යේ බිද වැටීමක් හමුවේ හිස් වන අවකාශය පිරවීමට ස්වාධීන නොවුවත් ආණ්ඩු ගැති නොවන ශිෂ්‍ය ක්‍රියාකාරිත්වක් නොමැති වීම ඒකාධිපතියාට සහනයකි. ස්වාධීන මතවාදයට අනුව එක් වු බුද්ධිමය කතිකාවතට කැප වුණු ශිෂ්‍ය ක්‍රියාකාරිත්වය මර්ධනය කළ  අන්තරයද මෙහිදී තමන් අතින් සිදුවූ මුග්ධ පාපකර්මය තේරැම්ගත යුතුය.
එන්න එන්නම විශ්ව විද්‍යාල ශිෂ්‍යයා සමාජ සන්දර්භය තුළ මතවාදීමය තලයක සිට ක්‍රියාකාරීවීම හීනව යයි.
නමුත් එහි අවසාන ඵලය ලෙස ඒකාධිපති පාලනයක සේයා මතු වෙමින් ඇත.